دليل الشركات والاماكن. فالويب


المسافرون العرب





تخلصي من عادة الضرب وضعي قواعد صحيحة لتربية ابنائك

Black rose Black rose
تخلصي من عادة الضرب وضعي قواعد صحيحة لتربية ابنائك
21-05-2017 - 10:55 pm

طيب معلومة مهمة على الماشي..
الطفل اللي بيكون اتعاملتي معاه باسلوب الضرب.. و قررتي و لله الحمد انك تبطلي ضرب و تحطي قواعد و تتعاملي معاه كويس و تمسكي اعصابك بقدر الامكان..الطفل دا.. لسة مش واثق في قرارك و بيبقى عايز يختبره .. وبيكون غاضب من فترة الضرب و الاهانة .. و بالتالي هاتلاقي مقاومة.. و غضب.. و نوبات غضب.. و تحدي.. و محاولة غير شريرة لاستفزازك.. وكأنه بيقولك هاتي اخرك.. انا عارف انك هاترجعي تاني تضربي.. انتي بقى دورك كأم..


اولا.. مهم جدا انك تعتذري عن الضرب صراحة.. و تقولي انا اسفة اني كنت باضربك.. ولكن ان شاء الله دا مش هايتكرر تاني.. انا باحبك.. يا رب تسامحني

ثانيا: مهم جدا جدا انك تصبري معلش.. لان اللي عملتيه في سنين مش هايتصلح في اسبوع.. انا باقولها من خبرتي في اطفال بتتغير في شهر و اطفال بتتغير في تلاتة و اطفال في ستة.. المهم الكل في النهاية بيستجيب لانهم على فطرتهم و لانهم محتاجين حبكم جدا.. و بالتالي معلش الامر فيه تحدي كبير ليكي و لاعصابك..
بس انتي هاتكسبي ابنك في نهاية المشوار ان شاء الله لكن صدقيني كل يوم هاتستمري فيه بقرار ايقاف العنف الحياة هاتفرق و هاتشوفي لمحات.. و صدقيني كلما كان القرار بوقف الضرب و التحكم في الاعصاب مع بعض هاتلاقي النتيجة اسرع بكتير

ثالثا: مهم جدا على الاقل تكتبي اهم تلات قواعد في البيت.. منها مواعيد النوم و الاستيقاظ، ومثلا ممنوع الضرب بين الاخوة و مثلا اوقات المذاكرة و الاتزام بها.. كبداية، و استمري على التشجيع و قللي من انتقادك و ابتدي شوفي الحلو فيهم.. دا هايوفر عليكي انهيار اعصابك اكثر من مرة في اليوم

رابعا: مهم جدا راقبي ايه اللي بينرفزك و بيستفزك و لما تلاقي ابنك بيعمله بسرعة حاولي تشتتي انتباهه عنه عشان ما تقعوش في فخ الاستفزاز و العصبية

خامسا: انا عارفة انك تعبانة و نفسك ابنك يتغير.. بس ربنا سبحانه و تعالى قال في كتابه الكريم (إن الله لا يغير ما بقوم حتى يغيروا ما بأنفسهم) عشان كدا انا باقولك انتي الاول اتغيري و هاتشوفي ابنك و جوزك و عالمك كله بيتغيروا معاكي للاحسن ان شاء الله

سادسا: ودي نقطة لازم لا نغفل عنها ابدا.. استمري بالدعاء لنفسك و لابنك .. الدعاء مع الاخذ بالاسباب..

سابعا: و يمكن دي انا قولتها في مقال سابق.. ان الطفل مهما كان عمره .. و تعرض للضرب و الاهانة.. صحيح انه ممكن ما ينساش الضرب ولا الخوف ولا الالم النفسي.. ولكنه هايسامح ان شاء الله .. فاوعي تقولي فات الاوان.. و خصصي وقت نوعي ليكي انتي و ابنك او بنتك . لكل واحد فيهم على انفراد و لو لومدة عشر دقايق يوميا اتكلمي معاه و اسمعيه بدون نصايح ولا ارشادات.. اهتمي بيه هو كإنسان هاتشوفي الفرقواحرصي على تقبيل ابنك او بنتك يوميا على الاقل اربع مرات و عشرين حضن.. كدا بالعدد.. حتى لو انتي مش بتحبي الاحضان.. و لو هم بيرفضوا في الاول معلش بس لحد ما يحسوا بحضنك مرة تانية.. والله هاتشوفي الفرق.. واول فرق هاتلاقيه في ابتسامتهم و اللمعة اللي في عينيهم

ثامنا: اي حد يقولك انتي مدلعة ابنك و لما كان بيتضرب كان بيمشي زي الالف.. اعرفي انه ما يعرفش حاجة.. لانك انتي كنتي بتضربي ابنك ومافيش اي سلوك اتحسن ولا اي عادة سيئة اتغيرت بالعكس ابتدى ابنك يقولك باكرهك سواء بالكلمات او بنظراته او حتى ببعده عنك.. اوعي تفكري ترجعي للضرب مهما حصل.. افتكري انك قطعتي مشوار كبير و قربتي توصلي بعون الله..

تاسعا: افتكري ان الضرب و العصبية احد الاسباب الرئيسية لمشاكل سلوكية كتيرة زي الكذب و العناد و التأتأة، و عدم الثقة بالنفس، و التبول اللائرادي، و نوبات الغضب، والعنف في المدرسة.. يعني انتي غالبا مالكيش حل غير انك توقفيه و تستمري

عاشراً.. انا أحبك في الله وواثقة والله انك هاتفرحيني بقصة نجاحك مع ولادك.. كل يوم بيعدي و انتي مش بتضربي هو انتصار بس لو وقعتي في النص عادي قومي على رجليكي و كملي.. و احنا معاكي بندعيلك و بنجتهد اننا نقدم لك كل اللي تحتاجيه من دعم بالمعلومات عشان تقدري تكملي.. عشان خاطر ولادك استمري.. لانهم امانة مش ملكية خاصة.. ولانك عايزاهم سعداءابتسمي.. وثقي بالله.. و قرري.. و ايدي في ايدك..امسحي الدموع من على عينك..وارفعي ايدك لله واصدقي النيةوالله الذي لا إله إلا هو.. انك هاتقدري..احبكم في الله
دعاء صفوت


صور




تربية الاطفالضرب الاطفالكيف تعاقبي طفلك بدون ضربقواعد التربية الصحيحةضرب الاطفالابنكبنتكاولادكاطفالك


سجلي دخولك للمشاركة على هذا الموضوع تسجيل دخول إذا لم يكن لديك عضوية يمكنك تسجيلها الآن من الرابط التالي: تسجيل عضوية جديدة

Share

تخلصي من عادة الضرب وضعي قواعد صحيحة لتربية ابنائك




بشرى سارة لكافة عضوات ورواد منتديات العرب الفراشة حيث تعود إليكم من جديد بعد التوقف من قبل منتديات ياهوو مكتوب ، ونود ان نعلمكم اننا قد انتقلنا على نطاق elfrashah.com
وهو النطاق الوحيد الذي يمتلك حق نشر كافة المشاركات والمواضيع السابقة على منتديات ياهوو مكتوب وسوف يتم نشر 500,000 ألف موضوع 5,000,000 مليون مشاركة وأكثر من 2,000,000 مليون صورة ما يقرب من 5,000 GB من المرفقات وهي إجمالي محتويات منتديات الفراشة للاستفادة منها والتفاعل معها كحق اساسي لكل عضوة قامت بتأسيس هذا المحتوى على الانترنت العربي بغرض الفائدة.

لمزيد من التفاصيل يمكنكم مراسلتنا من خلال نموذح الاتصال, منتديات الفراشة على Facebook