للبنات اللي ماتزوجوا ممكن شوي فديتكم

السلام عليكم ويا هلا با حلى بنوتات عندنا بالفراشه
انا بصراحه اتعجب من كثرة طرح المواضيع للبنات اللي يبون يتزوجون هنا وبالنسبه لي بعضهم تكون اعمارهم صغيره
لا تقولون اني ما احس فيكم او برغبتكم في الستر وتجربه حياه جديده وانكم تلاقون شخص يبادلكم العاطفه لا والله
ويشهد علي رب العالمين اني اتمنى لكم الزواج وان الله يرزقكم بالازواج الصالحين وييسر لكم اموركم واني ادعي لكم
لكن يا بنات في شيئ لازم يكون من قناعاتكم وايمانكم
ان الله ما اخر زواجكم الا لحكمه
انو يرزقكم برجال صالحين عابدين يتقون الله فيكم
انا من تجربه حياه الواقع اقول لكم
بنات اعرفهم صاروا على ابواب الثلاثين و32و28
والله ماشاء الله ربي رزقهم باحسن رجال ويسر لهم امورهم
احسن من حال بنات كثثير
فاصبروا ولا تسخطون ولا تنزعجون واتركي هالشي قناعه براسك وايمان بقلبك ان الله ما يخيب ظن عبده فيه وبتشوفون باذن الله
النتيجه
وكمان الصلاه في وقتها
والاستغفار
والدعاء بين الاذان والاقامه بالرزق والتيسير في الدنيا والاخره
والدعاء وقت السجود
وايام الجمعه والصوم لوجه الله
هذي امور تخفف من الذنوب وتيسر الرزق
فما يحبس عنا ارزاقنا الا ذنوبنا
وانتبهوا من موضوع العين او الحسد
انتبهوا منه لانفسكم او ان تصيبوا فيه احد قريب منكم
لاتقولون احنا مانحسد لا يمكن يصير في نفوسكم شيئ من غير لاتحسون
فاذكروا الله واكثروا من ذكره ومن ماشاء الله
حتى لا تضرون غيركم من صحباتكم او من قريباتكم من غير لاتدرون
انا هنا حبيت اكتب لكم هالكلمات من قلبي لقلوبكم
واللي تقول انو صديقاتي تزوجوا وانخطبوا وانا حالي حال البنات ابي اتزوج اقول لها
اذا رزقك مكتوب لك عند ربك ليش تخافين وليش تستعجلين
واذا حسيتم ان موضوع زواج صديقاتكم ماثر على نفسياتكم تعرفوا على بنات جدد مو متزوجات وبكذا تكون حالتكم النفسيه اخف مع المحافظه على صديقاتكم لكن بس عشان تقوي احساسك
وكمان تذكري المثل اللي يقول عنوسة الكرامه ولا زواج المهانه
وانظري للي حالتهم اسواء من حالتك
عشان تحسين بالرضى وتعدين نعمة ربك عليك وتعجزين تحصيها
وتحمدين ربك وتشكريه
انا هذي كلمتي للي ماتزوجوا
اما اللي انخطبوا وتجي الوحده تكتب موضوع جاني عريس والخ
اوافق والا لا
اولا انا اقول لك ياحبيبتي لا تلجأين لنا
احنا بنات من مجتمعات مختلفه
وطبقات ماديه مختلفه
وقبايل مختلفه لنا عادات وتقاليد تختلف عنك
يمكن انتي ترضين بعريس راتبه 7الاف وغيرك ترضى باللي راتبه الفين وغيرك ماترضى باللي راتبه عشرين الف
لا تطرحين موضوعك هنا
روحي استخيري
الاستخاره هي الحل
ثم الاستشاره والسؤال عن العريس
ومن ثم اللي فيه خير ربك بييسره ويسهله لك
انا هنا حبيت اوضح لك
استخيري وان عجزتي وزادت حيرتك قولي لامك او ابوك يستخيرون معك
لانو انا مريت بها الحاله لما جاء زوجي يخطب
ورفضت لكن ابوي قبل لا يرفضه استخار لي
وجاء قال لي انو انا استخرت لك يا بنتي واشوف ان فيه خير لك
واقنعني بكلامه ووافقت والحمد لله ما ندمت
واللي الله كاتبه لكم ومقدره بتشوفونه باذن الله
واخيرا وليس اخراا
اتمنى كلماتي هذي ما تكون زعلت احد مني
او ضايقتكم بشيئ
انا ما كتبتي موضوعي من فراغ
انا حبيت اوصل لكم فكره اني معكم واحس فيكم
وحبيت افيدكم
والله يوفقكم وييسر لكم اموركم
ويرزقكم من واسع فضله
ويقر عينكم بازواج صالحيين وذريه صالحه باره حافظه لكتابه الكريم
احبكم ومبتليه بحبكم ربي يحفظكم ويخليكم