نصائح من واقع تجربتي للعرايس

نصائح روعة
كملي بإنتظارك
انا عروس وباقي على زواجي شهرين انتظر نصائحك يالغلا
جزااك الله خيرا

جزاك الله خير ع النصايح يا عسل

الله يجزاك عنا كل خير يارب

كملي يا قمر متابعين

معليش امكن تكون الافكار مو مرتبه كتير بس بحاول كل ماافتكر شيء مفيد حكتبه لكم
بالنسبه لقمصان النوم حاولي ماتكتري من الغالي , لان الرجال اهم شيء عندهم انو
عريان ومغري بالدنيا
, والله انهم مايفرقو, يعني مو عيب لو اشتريتي كم قميص نوم من الهرم او من المحلات الرخيصه ,
وعلى فكره الي من جده , لايفوتكم تعدو على سوق جده الدولى صح انه سار سوق محد
يروحو لكني لقيت عنده قمصان خرافيه وخاماتها راقيه , واسعارها معقوله,
وحتى قميص الدخله اخدته من هناك.
زي ماقلنا قبل الفرح بفتره يفضل تكوني مخلصه كل امورك ,
وحاولي لو تقدري قبل الفرح بيوم او 2 تخصصي يوم كامل تقضيه مع اهلك واخوانك
تجلو تنبسطو والكل يحسسك انك عروسه وتتكلمو , والله قمة الوناسه
عيشي الفرحه , مو طول الوقت تقضيه في جري الاسواق.
يفضل تتفقو انتي واخواتك بخصوص مواصلاتكم يوم الفرح ,
العروسه لازم يكون في شخص مسؤول عن كل تنقلاتها واحتياجاتها يوم الفرح ,
يعني اختاري اي واحد من اخوانك يكون باله طويل , والبقيه يتوزعو , المهم لازم كل واحد يكون عارف حيوصل مين
عشان ماتحصل اغلاط او تااخير لاسمح الله.
بالنسبه للصور اكيد كل وحده متفقه مع مصورتها على عدد معين من الصور , فحرام تضيع في صور مالها داعي
بمعنى اكتبي في ورقه مثلا 40 صوره للعروسه والعريس لوحدهم
15 صوره لعروسين مع اهل العريس
15 صوره للعروسين مع اهل العروسه
اكتبي كمان اسماء الاشخاص الي حتتصوري معاهم ,
وخليها عند المصوره عشان تفكرك بيها
ولا تنسي تنسقي مع الرجال اخوانك وابوكي يجو يتصورو معاكي في ساعه محدده
انا في زواجي للاسف اكتشفت اني اغلب اهلي مااتصورت معاهم من كتر الحوسه والرجه. ,
وفي ملكتي اكتشفت انه ماعندي غير صوره وحده بس مع امي.
في نظام تقريبا في كل الصوالين , ان الوحده حتى لو حاجزة موعد من بدري
حتجلس تنتظر لغاية مايخلصو كل الي جو قبلها للصالون
فااحسن شيء من الصباح بدري اساعه 11 او 12 خلى امك او اختك او حتى الشغاله
تروح الصالون تسحبلك رقم للشعر والمكياج وترجع البيت
, يسير انتي تروحي الصاالون براحتك على الساعه 5 العصر وانتي رايقه ,
او انك تروحي الظهر تعملي حمام مغربي او قناع نظاره للوجه
طبعا تكوني مخلصه كل امورك قبلها بيوم او يومين من حلاوه وفتله وحواجب وكل شيء.
بالنسبه وقت ماتجهزو لفرش البيت وقبل ماتفصلو المطبخ ,
انا انصحك وبشده انك تقولي لزوجك يجيب غسالة صحون ( دِش واشر)
والله يابنات انها احلى اختراع شفته , مريحه فوق ماتتصوري , تغسل وتعقم وتنشف
الصحون والكاسات والقدور وكل شيء ,
كل الي عليكي انك بعد ماتاكلو تشيلي بقايا الاكل من الصحون وتدخليها فيها
ميزتها انها تريحك كتير من غسيل الصحون وتوفر عليكي وقت كتير
غير كدا ماتتعدم يدك من كتر الغسيل
, لاتقولي احنا لسه شخصين ومافي صحون كتيره
والله لما تجي تطبخي ولا تسوي شيء بسيط حتتفاجئي بكمية الصحون والملاعق الي خرجت
انا جربتها وجدا ريحتني و انصح فيها بقوه.
اذا تقدري تفهمي اخواتك واخوانك على سبيل الدعابه طبعا ,
عشان مايقولو البنت مفجوعه, انك ماتبغي هدايا للزواج , ويعطوكي فلوس الهدايا كاش
, مره حتستفيدي كتير , اكتر من انك تاخدي هدايا ماتعجبك ولا مو مناسبه ولا عندك منها كتير.
نصيحه , اصحك تخلي مهرك في يدك او في حسابك مهما كنتي كبيره
, خليه عند امك او اختك الكبيرة , عشان ماينصرف بسرعه وانتي مو حاسه
, وابدئي اول شيء بشراء الملابس و قمصان النوم , وخلي المكياج و العطور اخر شيء.
بالنسبه ليوم الفرح , وانتي بتنضظري دورك عند الكوفيره , خلي معاكي في الشنطه
ورقة ادعيه وتحصين او مصحف صغير , استغلي وقتك بقراءة شويه من القران
, وحصني نفسك كويس, واستغفري عشان ربنا يفتح عليكي ويسهل امورك.
في ملاحظه بسيطه كثير يغفل عنها ولكنها تسيب اثر طول العمر
, فترة التخطيط للزواج فترة جدا مهمه خاصتا لو كان الزواج شراكه
, لانه حيخلي زوجك واهله ياخدو انطباع عن شخصيتك من خلال تصرفاتك ومسايرتك لهم
بمعنى لو عندتي واصريتي على موقفك بخصوص زفه او قاعه او اي شيء
من مبدا انك انتي صحبة الفرح والمفروض كل شيء يسير على زوقك
, صدقيني حتفضل حاجه وحشه في نفس اهل زوجك منك , وحيقولو هدي قويه ومن بدري بتمشي كلامها.
هدا الشيء لاحظتو كتير كتير مشاكل تحصل بسبب موضوع تافه زي دا
الحل انك تسايريهم وتكوني مرنه
, او انك بالكلام الدلع والغنج تقنعي زوجك وهو عندك فترة الملكه انك تبغي الشيء الفلاني
بس عشان مايزعلو اهلو منك يفهمهم انو هو الي يبغى دا الشيء
وطبعا مستحيل يرفضو رغبة ولدهم وهو عريس .
قبل الزواج بشهر افضل لاتخلي زوجك يشوفك عشان تشتاقو لبعض اكتر
وقبل الزواج بااسبوع لاتكلميه بالجوال اكتفو بالمسجات , كدا حتشتاقو لبعض اكتر .
حاولي تسوي مفاجئه حلوه لزوجك يوم الفرح يكون مو متوقعها حتفضل دكرا تجنن ,
مثلا في نفس القاعه اذا في فكره كان نفسه هو يسويها بس لاي سبب ماقدر او
مامداه , حاولي تسويها عشان يتفاجى بيها
انا فترة زواجي كان زوجي يدور على شكل معين من الشموع الضخمه الي زي شعلة
النار , لكنها كانت غاليه مره , فبطل
لكني سويتها له مفاجئه واحنا في الكوشه ولما اشتغلت قدامه مره انبسط.
بنات في نصيحه جدا مهمه للي حتسافر في شهر العسل
صدقيني قد ماتكوني ماخده على خطيبك وكل شيء,
بعد الزواج حتكوني مكسوفه منه جدا فوق ماتتخيلي
عشان كدا ماحتقدري تتجرائي تطلبي منه شيء , فعشان كدا افضل شيء خدي احتياطك من البدايه
, وانتي مسافره خدي معاكي علبة حفايض للدوره حتى لو ماكان موعدها
, وخدي معاكي دوا للاسهال الله يعزكم ودوا للاستفراغ
, لان غالبا مع تغيير الجو يسير اشياء زي كدا
, وطبعا مره احراج لساعك عروسه تقوليله اشتريلي دوا للاسهال ولا للاستفراغ
انا سار معايا كدا الحمدلله على كل حال, وجلست يومين وانا ميته من التعب
لكني مكسوفه اقوله
, لدرجة اني كنت اخرج انام في الصاله عشان مايسمع اصوات ولا شيء تعرفو مع الاسهال الله يعزكم وكنت اقوله ماابغى ازعجك بالكحه
الظريف في الموضوع انه خلاني انام في الصاله براحتي بس لما صحيت
لقيته نايم في الصاله في الارض واتاريني ماخده راحتي وهو جنبي وانا مااعرف
, المهم لما حسيت نفسي بموت فاارسلت له مسج قولتله ابغى ادويه.
انتظروني في بقية الافكار ان شاء الله
وبالله لاتنسو تدعولي بالدريه الصالحه عاجلا غير اجل

الله يرزقك بالذريه الصاالحه ويفرح قلبك
متآآبعتك يالغلا

انا مو عروسه بس نصايحك عسل
بأنتظار الباقي النصايح
نستفيد للمستقبل

يسلمو ع الكلام الحلو الله يجعلة في ميزان حسناتك

مشكورات اخواتي
الله يسعد كل وحده ردت عليا ويحقق لها كل الي تتمناه