عشان لو زعلتو هو اللي يصالحك و يبوس ايدك كمان

1. دنا هخليكي أميرة و جوزك مارد الخاتم اللي هيقلك شبيك لبيك ...


2. التصرف الصحيح :


3. 1) المرونة و التطنيش الارادي


4. 2) الذاكرة الحديدية و الزهايمر الإرادي


5. طب ادكو على الألف جنيه الأول ههه


6. 3) كوني إنتي النسمة الرقيقة في حياته

السلام عليكم
صلوا على رسول الله و ادعو للأمة الضعيفة دي (اللي هي أنا يعني ) بتيسير الأمور
بصو بقى أنا بقالي فترة ببحث و أنقب في موضوع الزعل ده ، مين زعل مين و مين يصالح مين و كل الحوارات دي و اهتديت بفضل الله لاستراتيجية:

• هتقلل الزعل بينكم
• هتقربكو أكثر من بعض
• هتخلي جوزك يخاف على زعلك
• هتخليه يجري وراك زي المنوم مغناطيسياً ههه

كل وحدة تدفع 100 ريال وهؤلها على السر ...
إيه 1000 ريال كتير ؟؟؟

دنا هخليكي أميرة و جوزك مارد الخاتم اللي هيقلك شبيك لبيك ...

ههه أنا بهزر طبعاً دعوة بظهر الغيب أغلى من الملايين فمتستخسروهاش فيا يا فوتكات
أنا هحكلكم عن تجربتي، أنا فأول زواجي و طبعاً زي معظم البنات فاهمة اني أميرة الأميرات و ملكة الملكات و جوزي مش ممكن يعمل حاجة تزعلني و لو زعلت مش ممكن يقدر على زعلي و هيجري يصلحني ويغنيلي "وحشني كلامو يا هوى سهران ما بنام ... روح قلو يجيني يا هوى ده كتير و حرام" ههه بس يا أوخشي مفيش حاجة من دي كانت بتحصل، لو زعلت بيسبني ويروح ينام عادي يعني و لا يسهر ولا نيلة ههه
جيت في يوم قعدت مع نفسي و راجعت اخطائي لقيت نفسي برتكب حاجات شنيعة عشان كده جوزي ما كانش بيفرق معاه زعلي، أنا حقولكو عليها عشان تخدو بالكو و متعملوهاش :

• أنا كنت حساسة و "زعولة" قوي يعني بزعل على كل حاجة و أي حاجة عملها جوزي و معجبتنيش أو حسيت إنه جرح احساسي بيها و بتقمص و بقلب الجو نكد على الاخر، هو ممكن صالحني مرة أو إثنين بس بعض كده مبقاش ملاحق فخدها من قاصرها و مبقاش يسأل فيا حتى لو عيطت، تخيلو ؟؟؟
• كنت لو زعلت من حاجة أققلب في الدفاتر القديمة و أطلعلو القطط الفطسانة و أقولو فاكر لما عملت كذا و سويت كذا ...
• لو جيه يصلحني بعمل فيها عندي كرامة و مبرداش ألين بسرعة

التصرف الصحيح :

1) المرونة و التطنيش الارادي

أولاً جوزك مش بيقرا أفكارك و مش ممكن يتنبأ بإحساسك يعني ممكن يعمل أو يقول حاجة تجرحك من غير ما يقصد و لو كان قاصد فإنتي بتديه جوكر يحاربك بيه مستقبلا ... فنصيحتي ليكي هي "تطنشي بمزاجك" تعملي نفسك هبلة مفهمتيش أو مسمعتيش و ده يسري على الحاجات الهايفة اللي بنحرق فيه دمنا على الفاضي "بص على وحدة" "علق على شكل بنت " "قولتلو يجيب حاجة ونسي" "قالك هيكلمك في التلفون ونسي " ...
ثانياً الرجالة بيريحهم قوي انك "متعتبهوش" لو عمل حاجة غلط إنتي ممكن تلفتي نظره بس من غير زعل و من غير قمصة
أمثلة :
جوزك اتأخر برة مع صحابو
رد الفعل الغلط >
هي : إنت يا راجل مش عارف انك بقى ليك بيت و ولاد و لا حنيت لأيام العزوبية و السرمحة لوش الفجر
هو : أنا راجل أدخل وقت منا عايز و أخرج وقت منا عايز إنتي هتتحكمي فيا ...
هو يروح ينام في غرفة تانية و هي تقعد تعيط لحد ما عنيها تورم و الصبح لما يصطبح بوشها الورمان من العياط و تحت عنيها اللي أزرق من قلة النوم هيقول في نفسه "ده أنا ليا حق اسهر لوش الفجر و أسيب البيت كمان لو مش عجبها "
رد الفعل الصحيح >
هي : حبيبي إنت جيت، سلامتك أنا انشغلت عليك، البيت بيبقى فاضي علي من غير حسك فيه يا حبيبي (و أحضنيه جامد)
هو : معلش يا حبيبتي أصل زمايلي في الشغل أصرو إننا نسهر برة شوية
هي : ومالو يا حبيبي مفهاش حاجة تسهر مع صحابك من وقت للتاني (شفتي إن تصرفك الكوول بيحطك في موقع قوة و فهمتيه إن دي حاجة مش مقبولة على طول )

2) الذاكرة الحديدية و الزهايمر الإرادي

يعني خلي عندك ذاكرة قوية للحاجات الحلوة وفكريه بيها ، مثلاً تكونوا قاعدين فكريه قد إيه كنت مبسوطة بيه أيام الخطوبة وكتب الكتاب وقد إيه كان رومانسي ، بس متجبيش سيرة إنه مبقاش رومانسي دلوقتي ههه لا حسن تقلب بخناقة , فكريه بهدية جبها لك و فرحت بيها قوي , سفرة سفرتوها ... الرجالة بيحبو حد يقيم الحاجات اللي بيعملوها و يديهم سكور "تنقيط" ... بيحبو يجيبو جوال (أهداف) ، حولي كل ميعمل حاجة حلوة تحسسيه إنو جاب جول
إمدحي أخلاقو و كرمه و علمه و ساعات شكله مش على طول عشان ميتغرش ههه
في منكو اللي هتقلي أنا لما بمدح جوزي بيتغر وينفش ريشه عليا ...
أنا هديكو الحل النهائي لموضوع ده عشان بعدها تمدحي براحتك وتكسبي نقاط كتير قوي

طب ادكو على الألف جنيه الأول ههه

شوفي يا ستي إنتي عشان تحصنيه من مرض "الاغترار بالنفس" لازم تديله السم في العسل، ازاي ؟ يعني وإنتي بتمدحه امدحي نفسك إنتي كمان، مثلاً لو قلك "شفتي جوزك وسيم ازاي " جاوبي إنتي " وهو إنت لو مكتش وسيم كنت إتجوزتك، الحلو بيتجوز الحلو" بكده هيحس انك في مستواه ومش هيقدر يشوف نفسه عليكي
وقس على ذلك
خلي عندك الزهايمر للحوادث التافهة والمشاكل الفاضية ومتحوليش تقلبي المواجع

3) كوني إنتي النسمة الرقيقة في حياته

إنتي لما تمدحيه وتحسسيه إنه راجل وشخص مميز وإنه بيسعدك و تكوني ديماً مبتسمة فوشه ، ده هيخليه كل ما الدنيا لطشت معاه يجيلك إنتي عشان إنتي اللي بيحس معاها إنه انسان رائع و احنا البشر بطبيعتنا بنحب الشخص اللي بيدنا الإحساس ده
4) كوني لينة وقت الزعل
يعني لو لا سمح الله تزعلت مع بعض وجيه يصلحك اوعى الشيطان يوسوسلك ويقولك "لا متصلحهوش، إيه معندكيش كرامة"
خلي قلبك أبيض زي الطفل الصغير ، و جوزك لو صدتيه مرة وإثنين هيبطل يجي يصلحك عشان كرامته هتنقح عليه
أجمل زعلة :
إيه ده هو في زعل حلو ؟؟ أيوة طبعاً ، لما الوحدة تزعل وتتقمص و تصرخ والجيران يسمع تبقى زعلة وحشة
بس لما تزعل وتسكت وتصبر و ترسم الوش "الحزين البريء" بتفرق، أصل خلي بالكو في "الوجه الحزين البريء" ، وده صاحبته جوزها بيبقى هاين عليه يضرب نفسه بالقلم لو زعلها
و الوجه الغاضب المفتري , ده صاحبته، جوزها بيبقى هاين عليه يضرب نفسه بالقلم برضه بس عشان إتجوزها من أساسه ههه
فاختاري إنتي عايزة تبقي مين