الفراشة أصبح فتيات Ftayat.com : يتم تحديث الموقع الآن ولذلك تم غلق النشر والمشاركات لحين الانتهاء من اتمام التحديث ترقبوا التحديث الجديد مزايا عديدة وخيارات تفاعلية سهلة وسريعه.
فتيات اكبر موقع وتطبيق نسائي في الخليج والوطن العربي يغطي كافة المجالات و المواضيع النسائية مثل الازياء وصفات الطبخ و الديكور و انظمة الحمية و الدايت و المكياج و العناية بالشعر والبشرة وكل ما يتعلق بصحة المرأة.
miss abeer
30-11-2022 - 07:31 pm
  1. ومقطوعين من شجره!!


قصة قصيميات في لبنان (قصه مره تضحك )هلا والله فيكم......
هذي قصة شفتها باحد المنتديات واعجبتني مرة وضحكتني مرة وحبيت انكم تشاركوني فيها.......
طبعا القصة طويلة مرة وعلشان مااخليكم تملون راح انزلها على شكل اجزاء....
وتكفون لاتفشلوني...ابي الكل يشارك...
صدقوني قصة حلووة وماراح تندمون لو قريتوها....
اسفة اني طولت عليكم....
يلا اخليكم مع القصة.....
قصيميات في لبنان
الجزء الاول
حصه وهيله ومنيره
ثلاثي بنوتي في بيت واحد ...
هذولي خوات ساكنين ببيت ابوهم بعد ماتوفى ومالهم في الدنيا غير هل بيت وراتب ابوهم التقاعدي ...

ومقطوعين من شجره!!

حصه: الاخت الكبيره يلقبونها وزارة الداخلية .. وموظفة في احد البنووك.. راتبه على قد وظيفته ..عمرها في حدود الاربعين .. تعتبر اعقلهم ..سنعه ..شخصيه قويه ..
هيله: الاخت الوسطى (الوسطى ولا الشرقيه؟!)<<بدا التميلح خ>>اكملكم متخرجه من معهد كمبيوتر وجالسه في البيت .. تلقب بأم لسانين ..عربجيه بقوه.. تكره التنانير وتموت على سراويل السنه وفنايل العلاقي .. عادي تستهبل مع جيرانهم وتنسم كفرات سياراتهم .. كانت تلبس مريوله وتلبس تحته ترنق( بجامه)ابو خطين على الجنب
تمووت على شي اسمه مقالب .. ماتصدق تلقى خنفسانه او صوارير تاخذها وتحطهم بدرج اخته ...
بإختصار كانت ولد إلا حبتين!!
منيره :الاخت الصغرى ( اجل وين العظمى صاروا درجات حرااره !!!)<< داريه ودكم تقولون خلصينا هاتي السالفه !!
تدرس في الثانويه ,,شايفه عمره على خواته لانه الصغيره ..تلقب نفسه ب: ميمي <<ياي !!
منيره وحصه وهيله .... جالسين بالصاله عند التلفزيوون .. يشربوون شاهي مع كراث وفصفص والجلسه عسل ... وسوالييف على كيف كيفكم ****
حصه : منااير ,, وش بتس ياقلبي...؟! ضايق صدرتس اليوم؟؟!
منيره: الحين ورانا حنا كذا ..؟! كل زميلاتي يسافرون بالصيف برا وينبسطون وانا ماعمري تعديت حدود بيتنا.. ودي اسافر مثلهم ..لاتحسسونن بالنقص!!<<تستعطف خواته
حصه: وين تبينا نروح طيب؟ومع مين؟ ومن بيسنعنا ..ومن وين لنا مصروف يكفي!! انتي تحسبين المسأله سهله!!
هيله : هع هع جيبي مدرس رياضيات يحل لك المسأله !!
منيره: بدل ماتستخفين دمتس دوري لنا حل !!الله يخليكم ودي اسافر !!
حصه.. هيله ..متى تتطورون ؟!
الناس وصلوا المريخ وحنا سوريا ما وصلناه!!
حصه :حنا ماعلينا من غيرنا .. السفر ماهووب سهل !!
هيله : اذا على الفلوس راتب ابوي مع راتبتس يكفون .. واذا على المحرم ماعليتس ارقدي وامني انا عن الف محرم !! صدزز ( هذي لغير الناطقين بالقصيمي ومعناها صدق ) ليش حارمين انفسنا مادام اننا نقدر؟!
منيره: ايه خلاص ياحبيلتس خلينا نرووح !!
حصه : طيب وين ؟!؟
هيله : قوه لألمانيا تكفون .. عشان اتابع كاس العالم !!
منيره : اقول اووص انتي ..انا اقوول قوه للبنان .. عشان مانتعب انفسنا انجليزي ولا شي .. اخواننا عرب .. ومنه نروح نلعب بأشكالنا شووي انا اصير زي إليسا وحصه زي باسكال وانتي مثل نانسي !!
هيله :وع مالقيتي إلا ذولي من زينهن .. انا ازين منهن !
حصه : اقوول اهجدي انتي وياه .. فرضنا بنروح للبنان ..من بيحجز لنا ومن بيستقبلنا ووش عرفنا بالاماكن والسكن و....
منيره : خلوا كل شي علي .. انا ابسأل زميلاتي ..بس انتم قرروا!!
حصه : والله اني خايفه ...خلون افكر!!
منيره:ياحبيلتس ودي لو مره بحياتي استانس
(وكان لهذه الكلمه وقع شديد في نفس الحصي الي هو دلع حصه )...!
بعد اسبووع .. نزلت الحصي على البنات بالصاله .....
حصه ومعها ورقه تقرا منها :
بسم الله الرحمن الرحيم ..اما بعد .. بعد مناوشات ونقاشات وتكتيكات وتفكيرات متلازمه.. قررنا نحن (حصه ال.... )...
السفر خارج المملكه ولكن بشرووط سندرسها كتالي :
1/الميزانيه تكون بيدي وسوق لاتفكروون تروحون ..
2/ مسألة الكشف شيلوها من راسكم ..لو تعضين الارض ماخليتس تطلعين خشتس لأحد ..
3/ السفر لمدة اسبوع فقط ..
4/الاقتصاد بالاكل والشرب ..
5/ ان هيله تترك عنه اللقافه وطولة اللسان ...
6/ ان كلمتي هي اللي تمشي .. واي قرار اتخذه هناك ينفذ بلا نقاش هذا ولو تم تجديد في الشروط السابقه فيلزم الاطراف التقيد بها .. وإلا :.... اقعدوا هنا وانثبروا ....
هيله ومنيره بصووت واحد : لا لا لا خلاص اللي تبينه بيصير !!
وبدأت هيله ومنيره والحصي بتجهيز أغراض السفر..
هيله : اقول مناير .. وش رايتس اخذ لبس كشخه .. ولا كله ترنقات وقمصان ؟!
منيره ( بغت تجيها سكته قلبيه): وش قمصان انتي ووش ترنقات .. تبينهم ينزلوننا من الطياره!!!
الله يفشل العدو خوذي احسن لبس نبي نروح نكشخ هناك حنا موب اقل من غيرنا ...!!
هيله : اندري .. انا اقول محد يعرفنا .. يعني احس اني باخذ راحتي هناك..
حصه : وش دعوه عاد انتي مقصره هنا .. اقول ترى شارطه عليكم ولا ترى بهون !!
هيله : لا لا خلاص "وه بس" وانتي حبحر ( فلفل ) محد يقولتس شي .. كنت امزح معتس يااخيتي **
حصه : خلي مزحتس ذا بوقت ثاني .. وخلصي ترى بكره الساعه 8 لازم نصير بالمطار ..
منيره : اقول هلو .. تكفين عطين الكاميرا حقتس ودي اخذه معي ...!!
هيله : اقول طسي بذااك مابقى الاهي .. ماعندي غيره من ريحة المرحووم ..
منيره : من زينه الحين .. ابيض واسود .. ولا وبعد متكسره مابقى به سنتيمتر الا ملصق بشطرطون ..
هيله: ماعليتس .. يكفي انه من ابوي ..
حصه : وبعدين انتي وياه .. يالله خلصوا واخمدوا بفراشكم بروح اكمل المطبخ ..
الساعه..2.. بالليل ..
هيله .. يماه ..
منيره : بسم الله الرحمن الرحيم ... وش بتس وجع هبلتين !!
هيله : ماادري يماه حلمت حلم يخوف !!
منيره : خير اللهم اجعله خير .. وشو؟!
هيله : حلمت ان معانا بالطياره انتر تيكر .. واني تهاوشت معه وجدعن من الطيااره ؟؟
حصه : يوه وانتم ماتخلون احد ينام براحه !!
منيره : هيله .. اغديتس نايمه بس . وه ياشين الشهابه من كثر ماتهوجسين بالطياره تحلمين به خ وهذا اللي يشوف مصارعه قبل ينام !!
هيله : ووه بس توبه **
( ورجع الهدوء يعم ارجااء المكان )
الساعة 8 a.m
حصه جايه من المطبخ تنافخ وبيده مغرفه : قسم بالله ان ماقمتوا اني لا اهون عن السفر .. انتم كيفكم تروحون لخرخير وترجعون بنفس اليوم بعد .. قومي انتي وياه يالله !!!!
تقووم هلو وميمي بشين نفس يتسحبوون للحمام ( وانتم بكرامه ),, بعد اقل من نص ساعه الكل كان واقف عند باب البيت ..
منيره : الحين بنروح للبنان وتبيني اروح للمطار بليموزين ؟.!!!انا مناير اخر عمري اركب ليموزين ؟!
هيله : أي والله صادقه مناير المفروض استاجرنا دينا 2005عشان تودينا ..
منيره : تطنزين انتي ووجهتس .. اصلا هذا مستواكم .. حدكم بيجو 82
حصه : اقول رجعوا الشناط خلاص .. سفر ومانين مسافره ..!!
هيله ومنيره : خلاص خلااص أي والله نسكت ..
ركبوا الليموزين وراحوا للمطار ...
عند البوابه
الهندي : هدا كمسين ريال عطي ..
حصه : وشو خمسين .. لايكثر .. نزل شويه الله يعافيك !!
هيله : لا احسن حبي راسه .. وخري وخري افتح بوجه خط سريع واحط به نخل بعد !!
حصه : اقوول طسي ادخلي وخلين اتفاهم معه ..
هيله ومنيره في صالة الانتظار ..
منيره : ياي شوفي الاشكال الصح .. واو واو شوفي شنطة هذي اللي قدامنا هذا افندي ..
هيله : منهو الافندي ؟!
منيره : وش افنديه .. اقوول اسكتي تكفين لا تحومين تسبدي !!
وهيله ومنيره استلموا الناس ضحك .. وتطنزز...........................
حصه خلصت التذاكر وحملت الشناط وضبطت كل شي
حصه : يالله خلونا نركب خلاص نادى علينا ...
منيره : شلون نادى ؟ ماسمعت اسمي !!
هيله : هههاي ياربي يالمتطوره تبينه يقول يالله يامنيره تعالي اركبي ..
حصه ميته من الضحك ومناير تمشي قدامهم من الفشيله ,,,
وعند البوابه وقبل مايركبون .. نادى المنادي : الرجاء من الاخت حصه ال.... التوجه الى ادارة المطار للضروره وشكرا ..
هذا الجزء الاول وخلص......
ان شاء الله يكون عجبكم.....
واذا شفت تفاعل راح انزل الجزء الثاني على طوول........
ذ


التعليقات (9)
cute_mute
cute_mute
والله حلوه القصه عارفتها وحده من صديقاتي ارسلت لي اياها ولوتبين اكمل عنك خ<<< ملقوفه
ومشكوره

حنين-نجد
حنين-نجد
ممكن تكملي ودي اشوف الباقي
وين الفراشات

عاصفة الذكريات
عاصفة الذكريات
واو بليز كملي بسرعة

miss abeer
miss abeer
مع أن مارد ألا 3 بس لعيونهم راح أكمل

دينا محمود
دينا محمود
قصه شيقه جدا

بنت السحايب
بنت السحايب
قصة مرة روعة
تسلمين عليهاقصص القصمان دايم تجنن ياحبي لهم

miss abeer
miss abeer
مشكورين على الرد يا دينا محمود وبنت السحايب

حولا مركزة
حولا مركزة
مشكورة وكملي اللة يعافيك

wejdan
wejdan
واي
كملي القصة ما احب اقطع بالقصص

الأخوات المتأخرات عن الزواج اليكم هذه القصه
قصص من تزوجن بعد قيام الليل او قراءة سورة البقرة