لكل امراة تطلقت وحاسة انه نهاية الدينا

هاي يا احلى فراشات لي زمان ما دخلت المنتدى اكثر من سنة , الصراحة لكم وحشة
انا هنا اليوم اقولكم قصتي يمكن البعض بيحزن علي والبعض بيلومني والبعض اتمنى انه يتعلم مني
انا بنت حبت شخص واتفقوا على الزواج ورضيت بكل تصرفاته وتصرفات هله وامه بالذات وقلت معليش يا بنت عشان خاطر زوجك وحملت وانجبت بنت قمر وبعد سنتين شبه زواج تطلقت وطلعت من المحكمة شبه منهارة او انسانة مالها اي احساس وطبعا انطويت على عمري مع العلم اني انا الي طلبت الانفصال وكرهت عمري وقتها كانت الامتحانات النهائية للجامعه ومن هنا حلفت اني اغير حياتي وانسى الي صار لان مافي شي يستاهل .
في البداية كان الوضع صعب لاني كنت احبه كثير بس قويت نفسي وقلت عندي بنت ولازم تتربى احسن تربية وجلست اذاكر الى ما خلصت الامتحانات وبعدها صرت ادور على شغل ما ابي اكون عالة على احد حتى لو كانو اهلي وفعلا لقيت شغل وبراتب حلو وقلت هذا رزق البنت ولازم احافظ عليه ويوم بعد يوم تحسنت نفسيتس واوضاعي رجعت احس اني فعلا بنت عمرها 21 مو وحدة عمرها 30 من زود الهم والمشاكل احس كنت اكبر بعشرين سنة وقتها الكل كان يقولي شكلك متغير وحزين بس الحين الحمدلله كل من قالي اني تغيرت للاحسن صارت نفسيتي غير صارت الدنيا احلى في عيوني بكثير وصارت ممتعه الحمدلله كملت سنه غيرت تخصصي في الجامعه وشريت لي السيارة الي كنت احلم فيها وبنتي الحمدلله في احسن حال في البداية كنت اقول ان الطلاق بيكون نهاية الدنيا وما توقعت انه بداية حياة جديدة لي ولبنتي .
بنات والله شاهد علي اني كنت اموت فيه بس رب العالمين مسح على قلبي وقدرت انساه ادري انه شي صعب بس ادعي رب العالمين انه يخفف عن اي وحدة مرت بهذه الظروف ,
والي يقول انه حظ المطلقة اقل من البنت غلطان انا من انفصلت تقدمولي 2 واحد دكتور والثاني رائد في الداخلية يعني كل واحد يقول الزود عندي بس الاثنين ما حسيت براحة لما شفتهم
يا بنات انا ما اقول الطلاق سهل ولا احسن من الزواج الصراحة انا ودي اتزوج واحب وانحب بس انا اقول انه الطلاق مو نهاية الدنيا
وعشان ما اطول عليكم ربي يوفق كل بنات المسلمين ويعطي كل وحدة الي في خاطرها